असार १५, २०७८ मा प्रकाशित, झापा – बालकक्षा शिक्षक तथा कार्यालय सहयोगीलाई संघीय सरकारले तोकेको तलब सुविधा नछुट्याएको भन्दै झापाको नेपाल शिक्षक महासंघले भद्रपुर नगरपालिका कार्यालयमा मंगलबारदेखि धर्ना दिएको छ।

नगरपालिकाको आगामी आर्थिक वर्षको बजेटमा बालकक्षा शिक्षक तथा कार्यालय सहयोगीलाई दिइने तलबभन्दा धेरै न्यून छुट्याएको भन्दै नेपाल शिक्षक महासंघ भद्रपुर नगर समितिले केही दिन अघि नगरपालिकामा ज्ञापन पत्र बुझाएको थियो। तर नगरपालिकाले आफ्ना मागको सुनुवाइ नगरेको भन्दै महासंघ आन्दोलित बनेको हो।

महासंघ भद्रपुर अध्यक्ष गणेश गिरीको नेतृत्वमा नगरका क्रियाशील ६ वटा पेशागत संगठनका प्रतिनिधिसहितको टोलीले आइतबार नगरपालिका गएर उपप्रमुख चन्द्रमाया श्रेष्ठलाई दुई बुँदे आन्दोलनका कार्यक्रमसहित ज्ञापन पत्र बुझाएका थिए।

महासंघले मंगलबारदेखि असार १८ गतेसम्म नगरपालिका कार्यालयमा दैनिक दुई/दई घण्टा धर्ना दिने जनाएको छ। त्यति गर्दा पनि माग पूरा नभए थप आन्दोलनका कार्यक्रम ल्याइने महासंघले चेतावनी दिएको छ।

नगर उपप्रमुख श्रेष्ठले नगरपालिकाले विभिन्न शीर्षकवाट प्राप्त हुने कर समयमा प्राप्त हुन नसकेकोले साढे ६ करोड रुपैयाँ घाटा बजेट रहेको बताउँदै मागप्रति छलफल गरेर वार्ताबाट समस्याको समाधान निकालिने बताएकी थिइन्।