झापाको अर्जुनधारा नगरपालिका कार्यालयमा तालाबन्दी गरिएको छ । पालिकाले नगरभित्रका विभिन्न सामुदायिक विद्यालयहरुलाई दिनुपर्ने रकम निकासा नगरेकाले तालाबन्दी गरिएको नेपाल शिक्षक महासंघ अर्जुनधारा नगर कमिटी अध्यक्ष पुण्य सुवेदीले बताए ।  संघीय सरकारले अर्जुनधारा नगरपालिका भित्रका विभिन्न सामुदायिक विद्यालयलाई राष्ट्रपति शैक्षिक सुधार कार्यक्रम तथा सशर्त अनुदान अन्तर्गत भौतिक सुधार कार्यक्रमका योजनाहरु दिएको थियो । विद्यालयले योजनाहरु सम्पन्न गरि फाइल बुझाएपनि नगरपालिकाको लेखा शाखाले समयमा भुक्तानी नदिँदा रकम पाउनबाट विद्यालयहरु बञ्चित भएकाले तालाबन्दी गर्नुपरेको सुवेदीको भनाई छ ।

नगरपालिकाले भने विद्यालयहरूले समयमा काम सम्पन्न नगरेको र मसान्त अगावै लेखा प्रणालीसम्बन्धी सफ्टवेयर बन्द भएकाले समयमा भुक्तानी दिन नसकिएको जनाएको छ । नगरपालिकाका शिक्षा शाखा प्रमुख तोयानाथ रेग्मीले लेखा शाखाले नियत राखेर नभइ प्राविधिक समस्याका कारण समयमा भुक्तानी हुन नसकेको बताए ।