धरान — धरानस्थित बीपी कोइराला स्वास्थ्य विज्ञान प्रतिष्ठानमा सेवा सुरु गर्नुपर्ने मागसहित विभिन्न राजनीतिक दलले प्रदर्शन गरेका छन् । सोमबार नेकपा एमाले, राप्रपा नेपाल, संघीय लिम्बुवान राज्यपरिषद्लगायतले प्रतिष्ठानको ओपीडीलगायतका सेवा यथावत रूपमा सञ्चालनको माग गर्दै प्रदर्शन गरेका हुन् ।

आइतबारदेखि प्रतिष्ठानका बीपी प्रतिष्ठान शुद्धीकरण अभियान संयुक्त संघर्ष समितिले ओपीडी (बहिरंग) सेवा बहिष्कार गरेको छ । सहमति र सम्झौता कार्यान्वयन नभएको भन्दै आन्दोलनरत चिकित्सक, विद्यार्थी तथा कर्मचारीहरुले ओपीडी सेवा ठप्प पारेका हुन् । तर चिकित्सकहरुले उपकुलपति परिसरमा केही बिरामी स्वास्थ्य परीक्षण जारी राखेका छन् ।

प्रतिष्ठानमा बढ्दो बेथिति, आर्थिक भ्रष्टाचारविरुद्ध अढाई महिनाअघिको आन्दोलनपछि उच्चस्तरीय छानबिन कार्यदलको प्रतिवेदन र स्वास्थ्य मन्त्रालयले गरेको ६ बुँदे सहमति कार्यान्वयन नभएको भन्दै संघर्ष समितिले आइतबारदेखि इमर्जेन्सी र कोभिड अस्पतालको सेवावाहेक अन्य सबै बहिष्कार गरेको छ ।