सुनसरी — प्रधानन्यायाधीश चोलेन्द्र शमशेर जबरा विरुद्ध सुनसरी बारका कानुन व्यवसायीहरू पनि आन्दोलनमा उत्रिएका छन् । नेपाल बार एसोसिएसनमा आवद्ध सुनसरी बारका कानुन व्यवसायीहरू कालो मास्क लगाएर प्रधानन्यायाधीश जबराको राजीनामाको माग गर्दै कार्यालय हातामा ११ देखि १२ बजेसम्म धर्ना बसेका थिए ।

सुनसरी बारका अध्यक्ष शारदा प्रसाद अधिकारीको अगुवाइमा कानुन व्यवसायीहरूले सर्वोच्च अदालत परिसरमा जारी धर्ना तथा आन्दोलनको कार्यक्रमको समर्थनमा सुनसरी बार कालो मास्क लगाएर आन्दोलनमा उत्रिएको हो । प्रधानन्यायाधीश जबराको राजीनामा माग गर्दै आइतबारका लागि बार एसोसिएसनले देशभर आन्दोलनको घोषणा गरेको थियो ।