चिकित्सा शिक्षाका विद्यार्थीबाट चर्को शुल्क माग्ने काठमाडौं मेडिकल कलेज (केएमसी)विरुद्ध सात विद्यार्थी संगठनले प्रदर्शन गरेका छन् । विराटनगरस्थित नोबेल मेडिकल र सिनामंगलस्थित काठमाडौं मेडिकल कलेजले अतिरिक्त शुल्क र चर्को होस्टेल शुल्क मागेपछि पीडित विद्यार्थीसहित अन्य विद्यार्थी संगठनले आन्दोलन गरेका हुन् ।

आन्दोलनमा नेविसंघ, अखिल क्रान्तिकारी, अनेरास्ववियू, समाजवादी विद्यार्थी युनियन, विप्लवनिकट अखिल क्रान्तिकारी, अखिल छैटौँआबद्ध छन् । यी विद्यार्थी संगठनले नोबेल र काठमाडौं मेडिकल कलेजका सञ्चालक तत्काल पक्राउ गरी कारबाही गर्न माग गर्दै मंगलबार गृहमन्त्रीको ध्यानाकर्षण गराएका थिए ।

चिकित्सा शिक्षा आयोगले तोकेभन्दा बढी शुल्क लिई एमबिबिएस, बिडिएसमा अतिरिक्त शुल्क तथा चर्को होस्टेल शुल्क मागेर नोबेल र केएमसीले सन् २०२१ ब्याचका विद्यार्थीलाई अध्ययनबाट समेत वञ्चित गराएका छन् ।