कर्णाली स्वास्थ्य विज्ञान प्रतिष्ठान शिक्षण अस्पताल जुम्लाका प्रध्यापकहरु आन्दोलित भएका छन्।

प्रध्यापकहरुले विभिन्न समयमा स्थायित्वका लागि ज्ञापन पत्र दिएता पनि बेवास्ता गरिएको भन्दै हातमा कालो पट्टी बाधेर उनीहरु आन्देलमा उत्रिएका हुन्।

उनीहरुले पहिलो चरणमा असार १७ गते देखि २३ गते सम्म कालो पट्टी बाँधेर सेवा सुचारु गर्ने, साउन ६ गते सम्म तालाबन्दी सहित रिले अनशन बस्ने, र ६ गते देखि अनिश्चित कालिन आकस्मिक सेवा बाहेक अन्य सेवाहरु बन्द गर्ने कार्यक्रम सार्वजनिक गरेका छन्।

चिकित्सहरुले प्रध्यापकहरुको स्थायित्व नभएका कारण प्रतिष्ठानकै स्थायित्वमा चुनौती थपिएको भन्दै स्थायित्वका लागि आन्दोलन थालेका हुन्। प्रध्यापकहरुको आन्दोलनका विषयमा प्राध्यापक डाक्टर शेषानन्द संजेलले यहाँको जनशक्ति स्थायी भएमा मात्र कर्णालीले न्याय पाउने बताए।

प्रध्यापकहरु आन्दोलित भएको विषयमा प्रतिष्ठानका उपकुलपति डाक्टर मंगल रावलले यो विषय निरन्तर सरकारलाई पहल गरे पनि हाल सम्म पहल नभएको गुनासो गरे।