बझाङ — प्राविधिक शिक्षा पढाउने एक विद्यालयको कर्मचारी छनोटको क्रममा अनियमितता भएको भन्दै बझाङको छविस पाथीभेरा गाउँपालिकामा तालाबन्दी गरिएको छ ।

स्थानीय बान्नीचौर साधारण तथा प्राविधिक विद्यालयमा सिभिल इन्जिनियरिङ ल्याव असिस्टेन्ट कर्मचारीमा कागजात नपुगेको उम्मेदवारलाई छनोट गरिएको भन्दै असन्तुष्ट पक्षले तालाबन्दी गरेको हो । तीन वर्षदेखि रिक्त रहेको उक्त पदमा २०७९ जेठ ३१ विज्ञापन गरिएको भए पनि २०८० साउन १८ गतेमात्रै परीक्षा भएको थियो ।

 तीन जना उम्मेदवारको दरखास्त परेकोमा स्थानीय विमल जोशीलाई छनोट गरिएपछि असन्तुष्ट पक्षले पालिकामा नाराबाजीसहित आइतबार तालाबन्दी गरेका हुन् ।

गाउँपालिका अध्यक्ष बसन्त चलाउनेले भने कर्मचारी छनोटमा कुनै अनियमितता नभएको भन्दै आफ्नो उम्मेदवार छनोट नभएको झोकमा पालिकामा तालाबन्दी गरिएको बताए ।

 उनले छनोट भएका उम्मेदवार र असफल उम्मेदवार एउटै विद्यालयमा पढेर सँगै उत्तीर्ण भएको जनाउँदै उम्मेदवारको योग्यताका प्रमाण परीक्षा समितिसँग रहेको दाबी गरे । अराजक समूहले पालिकामा लगाएको ताला तोड्नका लागि आफुले प्रहरीलाई जानकारी गराइसकेको उनको भनाइ छ ।