मालपोत र नापी कार्यलयको सेवा केन्द्र स्थापना गर्ने निर्णय कार्यान्यवन गर्न माग गर्दै आन्दोलनमा उत्रिएका सिमराक्षेत्रका बन्दकर्तामाथि प्रहरीले हस्तक्षेप गर्दा तनाव भएको छ ।
सेवा केन्द्र थप गर्ने निर्णय स्थगन गरेको भन्दै छ दिनदेखि आन्दोलनरत स्थानीयले शुक्रवार आमहड्ताल घोषणा गर्दै यातायात र बजार ठप्प पारेपछि प्रहरीले बल प्रयोग गरेको हो । प्रहरीले बन्दकर्तालाई राजमार्गबाट हटाएर केही बेर यातायात सञ्चालन गरेको थियो ।
शान्तिपूर्ण आन्दोलनमा प्रहरीले हस्तक्षेप गरेको भन्दै आक्रोशित स्थानीयले अहिले राजमार्ग पुनः ठप्प पारेका छन् ।
बन्दकर्ता राजमार्गमा उत्रिएपछि सिमराको स्थिति अहिले तनावपूर्ण बनेको छ । बन्दकर्ताले राजमार्गमा प्रहरी हस्तक्षेपबिरुद्ध नारा लगाउदै मागप्रति गम्भीर हुन सरकारलाई आग्रह गरिरहेका छन् ।
प्रहरीले सातजना बन्दकर्तालाई नियन्त्रणमा समेत लिएको छ । प्रहरीले अर्जुन चिमरिया, धनबहादुर श्रेष्ठ, राजकुमार बर्तौला, शिव वाग्ले, प्रेम बराल, देब श्रेष्ठ, मिनप्रसाद आपागाईँ र नवराज श्रेष्ठलाई नियन्त्रणमा राखेको छ ।
पक्राउ परेकालाई तत्काल रिहा गर्न बन्दकर्ताले माग गरेका छन् । आफुहरुको आन्दोलनलाई दवाउन प्रहरीले सात जनालाई नियन्त्रणमा लिएको भन्दै स्थानीय मनोज पौडेलले तत्काल रिहा नगरे आन्दोलन थप चर्काउने चेतावनी दिए ।
बन्दकर्ताले पथलैयामासमेत यातायात ठप्प पारेका छन् । पथलैयामा यातायात ठप्प पारिँदा पूर्वपश्चिम राजमार्ग भएर चल्ने सवारी साधन अहिले बिच बाटोमै रोकिएका छन् । प्रहरीले पथलैयामा पनि बल प्रयोग गर्दै यातायात सञ्चालन गर्ने प्रयास गरिरहेको छ ।
नागरिकलाई पायक पर्ने स्थानमा सहज ढंगले सेवा पुर्याउने उद्धेश्यले देशका बिभिन्न स्थानसहित सरकारले मातपोत र नापि कार्यलयको सेवा केन्द्र सिमरामा स्थापना गर्ने निर्णय असोज ३० गते गरेको थियो ।
उक्त निर्णयबाट जिल्लाको उत्तरी भेगमा पर्ने पिप्रासिमरा, भवानीपुर जीतपुर, डुमरवाना, निजगढ, मनहर्वा, फत्तेपुर, छातापिप्रा, लिपनीमाल, ईनर्वासिरा, रामपुर टोकनी, अमलेखगञ्ज र बुनियाद गाविसका स्थानिय हर्षित भएका थिए ।
साविकका १२ गाविसका बासिन्दालाई पायक पर्ने स्थान तोकेर गरिएको उक्त निर्णयबाट खुशी भएका स्थानिय अहिले पुनःस्तब्ध बन्न पुगेका छन् । मालपोत र नापी सम्बन्धी कामकै लागि घण्टौसम्म समय लगाएर सदरमुकाम कलैया धाउनुपर्ने बाध्यताबाट गुज्रनु पर्ने अवस्था अन्त्य गर्न स्थानीयको माग छ ।