प्रा.डा. गोविन्द केसीले उठाएका मागप्रति सरकार गम्भीर नभएको भन्दै नेपाल चिकित्सक संघ आन्दोलित भएको छ । संघको शनिबार बसेको बैठकले सरकार र सरोकारवाला निकाय केसीको मागमा गम्भीर नभएको भन्दै २४ घण्टे अल्टिमेटम दिएको छ । बैठकले केसीको स्वास्थ्य गम्भीर भएको भन्दै तत्काल माग पूरा गर्न पनि सरकारको ध्यानाकर्षण गराएको छ । १० बुँदे माग राख्दै केसीले चैत ८ गतेदेखि त्रिवि शिक्षण अस्पताल महाराजगञ्जमा अनसन जारी राखेका छन् । बैठकले प्रा.डा. केसीले उठाएका माग २४ घण्टाभित्र पूरा नगरे चैत १६ गते बिहानदेखि सम्पूर्ण सरकारी, निजी, मेडिकल कलेज, नर्सिङ होम र क्लिनिकमा कालोपट्टी बाँधेर अस्पतालको प्रांगणमा बहिरंग सञ्चालन गर्ने निर्णय गरेको छ ।