लोहरपानी–५ लाँपेमा वेवारिसे बम विष्फोट हुँदा सोही ठाउँका २१ वर्षीय सुरेन्द्र बुढा र १६ वर्षीय दिलबहादुर घर्ती घाइते भएका छन् । प्रहरीले दिएको जानकारी अनुसार चैत्र २९ गते बेलुका बारीमा खर काट्ने क्रममा भेटिएको सकेट बम चलाउँदा बम विष्फोट भइ उनीहरू घाइते भएका हुन् । बम विष्फोटबाट सुरेन्द्रको हातको औँला र दिलबहादुरको आँखामा चोट लागेको प्रहरीले बताएको छ । घाइतेमध्ये दिलबहादुरको राप्ती उपक्षेत्रीय अस्पताल घोराहीमा उपचार भइरहेको छ भने सुरेन्द्रलाई थप उपचारको लागि कोहलपुर रिफर गरिएको प्रहरीले जानकारी दिएको छ । घाइते उपचारका लागि जिल्ला सदरमुकाम आए पछि घटना सार्वजनिक भएको हो । बम युद्धकालमा छाडिएको आशङ्का गर्दै घटनाको थप अनुसन्धान भइरहेको प्रहरीले जनाएको छ । इन्सेक, दाङ