'स्वामी' कमलनयनाचार्यका उत्तराधिकारी स्वामी कृष्णलाई गएराति चितवन राष्ट्रिय निकुञ्जले पक्राउ गरेको विरोधमा नवलपरासीमा विरोध सुरु भएको छ । निकुञ्जले कृष्णलाई नवलपरासीको बेलातारीबाट पक्राउ गरेको हो । निकुञ्जले पक्राउ गरेको भन्दै उनका समर्थकले पूर्व-पश्चिम महेन्द्र राजमार्ग अवरुद्ध पारेका छन् । विरोधले पूर्व आउने र पश्चिम जाने यात्रुहरु अलपत्र परेका छन् । त्रिवेणीमा रहेको चितवन राष्ट्रिय निकुञ्ज, सेक्टर वन र त्रिवेणी मध्यवर्ती सामुदायिक वन उपभोक्ता समितिका कर्मचारीलाई बाहिर निकालेर स्थानीयले कार्यालयमा तालाबन्दी गरेका छन् । इलाका वन कार्यालय कावासोतीमा पनि तालाबन्दी गरिएको छ । यसैगरी समर्थकले त्रिवेणी र सदरमुकाम परासीमा विरोध प्रदर्शन गरिरहेका छन् । उनलाई निकुञ्जको वन फाँडेको आरोप छ । चितवन निकुञ्जका प्रवक्ता टिकाराम पौडेलका अनुसार उनलाई मुख्यालय कसरास्थित हिरासतमा राखिएको छ । 'केहीबेरमा बयान लिन्छौँ,' उनले भने, 'विस्तृत अध्ययन गरेर उसमाथि लागेको आरोपबारे छानविन गर्ने छौँ ।' । रेञ्जर लक्षमण राय, गेम स्काउटहरु र त्रिवेणीको सुरक्षा तैनाथ नयाँ भैरवी गुल्मका सेनाले हिजो बेलुकी साढे ६ नियन्त्रणमा लिएर निकुञ्ज ल्याएको हो। कमलनयनाचार्यले निकुञ्जको त्रिवेणी क्षेत्रको झण्डै २५ बिगाहा जग्गा कब्जा गरि आश्रम, मठ-मन्दिर बनाएका छन् । निकुञ्जले झण्डै १० वर्षदेखि हटाउन प्रयसा गरेपनि सकेको थिएन ।