अग्राधिकारसहितको स्वायत्त कर्णाली प्रदेश माग गर्दै जुम्लामा शुरू भएको आन्दोलन हिंसात्मक बन्न थालेपछि स्थानीय प्रशासनले आज ३२ साउनमा पनि बिहानैदेखि कर्फ्यू आदेश जारी गरेको छ ।
३१ साउन साँझ ५:३० देखि ३२ साउन विहान ६:३० सम्म लगाइएको कर्फ्यूलाई विहान ८ बजेदेखि फेरि निरन्तर दिंदै अर्को सूचना जारी नभएसम्मका लागि लगाइएको हो ।
प्रदर्शनकारीले आफैं स्थानीय शासन सञ्चालन गर्ने भन्दै ३१ साउनमा जिल्लाका सरकारी कार्यालय कब्जामा लिएपछि प्रहरीले त्यसको प्रतिकार गर्ने क्रममा गोली चलाउँदा ७ जना घाइते भएका थिए । जुम्लामा ८ दिनदेखि लगातार हडताल र प्रदर्शन जारी छ ।
जुम्ला सदरमुकाम खलंगामा स्थिति नियन्त्रणभन्दा बाहिर जाँदै गर्दा थप सशस्त्र प्रहरी समेत मगाइएको छ । यसअघि पनि १२० सशस्त्र प्रहरी कोहलपुरबाट नेपाली सेनाको हेलिकप्टरमार्फत जुम्ला ल्याइसकिएको छ ।
गाउँगाउँबाट सर्वसाधारण आन्दोलनका लागि सदरमुकाम खलंगामा भेला हुने क्रम बढेपछि स्थिति तनावग्रस्त हुँदै गएको जिल्ला प्रशासन कार्यालयले जनाएको छ ।