कपिलवस्तुमा बन्द गराउँदै हिंडेका चन्द माओवादीका कार्यकर्ता र स्थानीय व्यवसायीबीच झडप हुँदा ८ जना घाइते भएका छन् । ३ असोज विहान कपिलवस्तुको जीतपुर बजार बन्द गराउँदै हिंडेका नेत्रविक्रम चन्द नेतृत्वको माओवादीका कार्यकर्ताहरुले वागगांगा गाविसको जीतपुर बजार बन्द गराउन थालेपछि स्थानीय व्यवसायीले प्रतिकार गरेका थिए । त्यसक्रमा भएको झडपमा परी ८ जना बन्दकर्ताहरु घाईते भएका हुन् । घाईते हुनेहरुमा चन्द माओवादीका जिल्ला सेक्रेटरी संगम पुन, जिल्ला सदस्य गणेश चौधरी लगायत ८ जना छन् । घाईते भएकाहरु मध्ये ३ जनालाई उपचारको लागि बुटवल लगिएको छ भने बांकी सवै घाईतेको स्थानीय अस्पतालमा उपचार भैरहेको प्रहरीले जनाएको छ । क्पिलवस्तु उद्योग वाणिज्य संघ, सिद्धार्थ बजार व्यवस्थापन समिति लगायत विभिन्न संघ संस्थाहरुको पहलमा एक महिना अघि वाणगंगा नगरपालिकालाई वन्द निषेधित क्षेत्र घोषणा गरिएको थियो । वन्द निषेधित क्षेत्रमा कुनै पनि दल र समूहको वन्दलाई निषेध गर्ने घोषणा गरे अनुरुप स्थानीय उद्योगी व्यवसायीहरु वन्दको प्रतिकारमा उत्रेका कारण झडप भएको प्रहरीले जनाएको छ । गोपाल भण्डारी, कपिलवस्तु