सर्लाही सदरमुकाम मलंगवामा प्रदर्शनकारी र प्रहरीबीच भएको झडपमा प्रहरी चलाएको गोली लागेर दुई जना घाइते भएका छन् । असोज ४ गते अपरान्ह साँढे तीन बजे मलंगवा-१० स्थित एमाले सांसद् कमलादेवी महतोको घरमा लगाइएको आगो निभाउन आउँदै गरेको दमकललाई प्रदर्शनकारीले रोकेर ढुंगामुढा गरेपछि प्रहरी र प्रदर्शनकारीबीच झडप भएको हो । घटनामा ३२ वर्षीय विक्रम रायलाई एक राउण्ड गोली लागेको प्रमुख जिल्ला अधिकारी मेघनाथ काफ्लेले बताए । घाइते रायलाई थप उपचारका लागि हेलिकप्टरबाट काठमाडौँ पठाइएको उनले जनाए । यसैगरी प्रहरीले चलाएको गोली लागेर महिनाथपुर-८ का २६ वर्षीय मितेश यादवसमेत घाइते भएका छन् । प्रहरीको गोली घाटीमा लागेर घाइते भएका राय मधेसी जनअधिकार फोरम लोकतान्त्रिकका वरिष्ठ उपाध्यक्ष रामेश्वर रायका छोरा रहेको जनाइएको छ । प्रदर्शन नियन्त्रण गर्न प्रहरीले ३५ राउण्ड हवाइ फायर र २ सेल अश्रु ग्याँस फायर गरेको प्रमुख जिल्ला अधिकारी काफलेले बताए । झडपमा घाइते भएका प्रदर्शनकारीको सर्लाही जिल्ला अस्पताल मलंगवामा उपचार भइरहेको छ । झडपमा सात प्रहरी समेत घाइते भएका छन् ।