मधेसी मोर्चाका कार्यकर्ताले राजविराज नपा-५ स्थित नापी शाखा कार्यालयमा मङ्सिर ८ गते राति आगजनी गर्दा कार्यालय परिसरको ग्यारेजमा राखिएको बा.१झ ३४०९ नम्बरको जीप पूर्णरूपमा जलेर नष्ट भएको छ । आगजनीको विषयमा जानकारी पाएलगत्तै पुगेको प्रहरी टोली र वारुणयन्त्रको सहयोगमा आगो नियन्त्रणमा लिइएका कारण थप क्षति हुन नपाएको प्रहरीले जनाएको छ । यस्तै प्रदर्शनकारीले राजविराज नपा-१ स्थित नेपाली काङ्ग्रेसको जिल्ला पार्टी कार्यालयमा समेत तोडफोड र आगजनीको प्रयास गरेका छन् । आगजनीबाट कार्यालयमा सामान्य क्षति भएको सप्तरी प्रहरीले जनाएको छ ।