दुहागढीको एक उद्योगमा आगजनी गरेको आरोपमा प्रहरीले पक्राउ गरेका विप्लव माओवादीका चार कार्यकर्तालाई बिहीबार सार्वजनिक गरेको छ । प्रहरीले संखुवासभा वाना–९ का बाबुराम राई, झापा पृथ्वीनगर–५ का नवीन अधिकारी, इटहरी सुनसरीका पुष्प अधिकारी र झापा कुमरखोदका चमनलाल माझीलाई सार्वजनिक गरेको हो । उनीहरूमाथि साकम्वरी प्रोडक्टमा तीन साताअघि आगजनी गरेको आरोप छ । विप्लव माओवादीका जिल्ला सेक्रेटरीसमेत रहेका बाबुराम राईको योजनामा सो उद्योगमा आगजनी भएको पाइएको झापा प्रहरीका प्रवक्ता भीम दाहालले जानकारी दिए । आगजनीबाट उद्योगमा ३३ लाख रुपैयाँभन्दा बढीको क्षति भएको थियो । उनीहरूले मजदुर र कर्मचारीलाई पेस्तोल देखाउँदै आगो लगाएको डिएसपी दाहालले बताए ।