” महिला सुरक्षा दबाब समुह नेपालले आज माइतिघर मण्डलामा आज अभाव, कालोबजारी नियन्त्रण तथा मानव अधिकारको सुरक्षाको लागि थाल, प्लेट तथा चम्चा बजाएर विरोध कार्यक्रम आयोजना गरेको छ । बैशाखमा गएको महाभूकम्प तथा संविधान जारी गरे पश्चात मधेसीमोर्चा लगायतले गरेको आन्दोलन र भारतले गरेको नाकाबन्दीका कारण बजारमा अति आवश्यकीय वस्तुहरुको अभाव भएको, ग्यास, पेट्रोल, डिजेल आदीको हाहाकार भएकोले विरोध गरिएको जनाइएको छ । अभावका कारण सुरु भएको कालोबजारीमा व्यापारी, नेता एवं प्रशासनकै मिलोमतो रहेको उक्त समुहको आरोप थियो । धर्नामा सहभागीहरुले ‘अभाव, महंगी, कालोबजारी बन्द गर !’ जस्ता नारा लेखिएका प्लेकार्डहरु बोकेका थिए ।