कचनापुर गाविस-६ हरिहरपुरका २६ वर्षीय अर्जुनकुमार बोहरा र सोही ठाउँका २३ वर्षीय केशवबहादुर थापालाई प्रहरीले यातना दिएको भन्दै यातना दिने प्रहरीविरूद्ध चैत १६ गते बाँके जिल्ला अदालतमा पीडितले यातना क्षतिपूर्तिसम्बन्धि मुद्दा दायर गरेका छन् । घटनामा संलग्न प्रहरीचौकी कचनापुरमा कार्यरत हवल्दार जनार्दन चौधरी र सोही कार्यालयमा कार्यरत प्रहरी जवान पदम बोहराविरूद्ध एडभोकेसी फोरमको कानूनी सहयोगमा यातना क्षतिपूर्तिसम्बन्धि मुद्दा दायर भएको हो । होली खेल्ने क्रममा स्थानीय राजेन्द्र पुन र रोशन बस्नेतसँग झगडा गरेको आरोपमा प्रहरीचौकी कचनापुरका प्रहरीले गिरफ्तार गरि दुई दिनसम्म यातना दिई गम्भिर रूपमा शारीरिक तथा मानसिक चोट पुर्‍याएको पीडितहरूद्वारा दायर गरिएको मुद्दामा उल्लेख छ । यातनाका कारण ढाड, हिप, कुहिना र खुट्टालगायत शरीरका विभिन्न भागमा निलडाम र चोट देखिएको अस्पतालको मेडिकल रिपोर्टमा उल्लेख भएको पीडितका कानुन व्यवसायी अधिवक्ता बसन्त गौतमले बताए । पीडितहरूले चैत १२ गते इन्सेक क्षेत्रीय कार्यालयमा निवेदन दिएपछि घटना बाहिर आएको थियो । इन्सेकले आवश्यक पहलका लागि सोही दिन राष्ट्रिय मानवअधिकार आयोगमा सिफारिससमेत गरेको थियो ।