सिद्धारा गाविस-४ की २२ वर्षीया सुशीला दर्जीको हत्या गरेको कसुरमा मृतकका २६ वर्षीय पति टुकवहादुर दर्जीलाई जिल्ला अदालतले असार १९ गते सर्वस्वसहित जन्मकैदको फैसला गरेको छ । जिल्ला अदालतका न्यायाधीश केशवप्रसाद बास्तोलाको इलाजसले प्राप्त प्रमाणको आधारमा सर्वस्वसहित जन्मकैद हुने गरी फैसला गरेको जिल्ला अदालतका मुद्दा फाँटका नासु नारायण भट्टराईले जानकारी दिए । टुकबहादुरले ०७२ चैत ३० गते पत्नीलाई कुटपीट गरी नजिकैको जङ्गलमा लगी झुण्ड्याएर हत्या गरेको आरोपसहित मृतकका माइती पक्षले ०७३ वैशाख १२ गते प्रहरीमा उजुरी दिएका थिए । उजुरीको आधारमा प्रहरीले सोही दिन दर्जीलाइ गिरफ्तार गरी अनुसन्धान गरेको थियो । लाशको जिल्ला अस्पताल सन्धिखर्कमा पोष्टमार्टम भएको थियो ।