मारुती सिमेन्ट कम्पनी चुनढुंगा खानीको सम्पर्क कार्यालय उदयपुरको देविछापमा सिन्धुलीका स्थानीयले धर्ना दिएका छन् । शनिबार दिउँसो सिन्धुलीको ककुरठाकुर गाउँ विकास समितिमा चुनढुंगा खानीबाट ढुंगा निकाल्ने क्रममा स्थानीय एक जनाको ज्यान गए पनि सम्बन्धित निकायले बेवास्ता गरेको भन्दै स्थानीयले धर्ना दिएका हुन् । चुनढुंगा खानीबाट ढुंगा निकाल्ने क्रममा खसेको ढुंगाले ककुठाकुर गाउँ विकास समितिका ४७ वर्षीय खड्ग बहादुर थापा मगरको ज्यान गएको थियो । मृतक वर्षे धानको ब्याड राख्नका लागि कुलोमा पानी लाउन गएका थिए । मारुती सिमेन्ट कम्पनी चुनढुंगा निकाल्दा ढुंगाले लाग्दा थापामगरको ज्यान गएको करठाकुर गाउँ विकास समितिका प्रावधिक सहायक भिम कुमार राइले जानकारी दिए । स्थानीयले उचित क्षति पूर्ति दिइनु पर्ने, दोषीलाई कारवाही गर्नु पर्ने माग गरेका छन् । यता जिल्ला प्रहरी कार्यालय सिन्धुलीका प्रहरी उपरीक्षक उमाशंकर पंजियारले सडक विस्तार गर्ने क्रममा एक्सकाभेटरले पाखामा खन्ने क्रममा ढुंगा खस्दा लागेको र मृतकको शव पोस्टमार्टम गरि परिवारलाई जिम्मा लगाई सकेको बताए । प्रहरीले थप अनुसन्धानका लागि आइतबार एक्स्काभेटरका चालकलै नियन्त्रणमा लिएको समेत जनाएको छ ।