नेपाल पत्रकार महासंघको केन्द्रीय कार्यालयमा बुधबार फेरि तालाबन्दी भएको छ । विभिन्न माग राखी नेपाल पत्रकार महासंघ शाखा सप्तरीका कार्यवहाक अध्यक्ष श्रवणकुमार देव लगायत डेढ दर्जन पत्रकारहरुले बुधबारदेखि महासंघ केन्द्रमा तालाबन्दीसहित अनिश्चितकालीन धर्ना दिएका हुन् । धर्नामा नेपाल प्रेस युनियन, प्रेस सेन्टर, संघीय प्रेस फोरम आबद्ध पत्रकारहरु पनि छन् । उनीहरुले विधानसम्मत सप्तरी शाखामा भएका कामकाजलाई अनुमोदन गर्नुपर्ने, प्रक्रिया पूरा गरेका सबै सदस्यहरुको नवीकरण गरिनुपर्ने, अविलम्ब शाखा सप्तरीको अधिवेशन गराउनुपर्ने र बन्द गरिएको सप्तरी शाखाका बैंक खाताहरु फुकुवा गर्नुपर्ने माग गरेका छन् । महासंघको केन्द्रीय कार्यसमितिले सप्तरी शाखामा विवाद देखिएपछि गत फागुन ७ गतेको जिल्ला अधिवेशन अनिश्चितकालका लागि स्थगित गरेको थियो । तर, विवाद समाधानै नगरी पछिल्लो पटक आउँदो वैशाख ७ गतेभित्र अधिवेशन गराउनुपर्ने महासंघ केन्द्रको निर्देशनप्रति पनि उनीहरुको आपत्ति छ ।