पर्साको छिपहरमाइ गाउँपालिका वाडा नम्बर ५ भिस्वामा रहेको स्वास्थ्य चौकीमा इन्चार्जको विषयलाई लिएर सिनियर अहेब र हेल्थ असिस्टेन्ट बीच झगडा भएको छ। हेल्थ असिस्टेन्ट शिवनारायण मण्डल र सिनियर अहेब तेज नारायण झा बीच हात हालाहाल नै भएको हो। झगडापछि दुवैजना स्वास्थ्य चौकी बन्द गरेर एक अर्का विरुद्ध उजुरी दिन प्रहरी चौकी भिस्वामा समेत पुगेका थिए। हात हालाहाल गर्दा उनीहरुको कपडा समेत च्यातिएको प्रत्यक्षदर्शीले बताएका छन्। पहिला सिनियर अहेब नारायण झालाई इन्चार्ज तोकिएकोमा हेल्थ असिस्टेन्टहरुले आन्दोलन गरेपछि हेल्थ असिस्टेन्ट नै इन्चार्ज हुने बताईएको थियो। जिल्ला जनस्वाथ्य कार्यालय पर्साका प्रमुख जनस्वास्थ्य अधिकृत राज किशोर पण्डितले भने अलिकति पनि धैर्य गर्न नसकेको कारणले घटना भएको बताए। इन्चार्जको विषयलाई लिएर स्वास्थ्य चौकीमा लामो समयदेखि विवाद चल्दै आएको छ।