नेविसंघका कार्यकर्ताले रत्ननगरमा रहेको शहिद स्मृति बहुमुखी क्याम्पसमा शुक्रबार तोडफोड गरेका छन् । अखिलका कार्यकर्ताले क्याम्पस परिसरमा एमालेको झन्डा राखेको विषयलाई लिएर नेविसंघका कार्यकर्ताले क्याम्पस प्रशासनमा तोडफोड गरेका हुन् । उनीहरुले प्रशासन कोठाको सिसा, क्याम्पस प्रमुख र सहायक क्याम्पस प्रमुखको कुर्ची र एउटा कम्प्युटर तोडफोड गरेको इलाका प्रहरी कार्यालय रत्ननगरका प्रमुख प्रहरी नायब उपरीक्षक नारायण रंजितकारले बताए । तोडफोडमा संलग्न रहेको आरोपमा प्रहरीले तीन जनालाई पक्राउ गरेको थियो । पक्राउ परेका नेविसंघको क्याम्पस इकाइ उपसभापति विवेक श्रेष्ठ, सन्तोष दुवादी र राजेश पाण्डेलाई पुन:घटना नदोहोर्याउने सर्तमा छाडिएको प्रहरी नायव उपरीक्षक रंजितकारले जानकारी दिए ।