हत्यामा संलग्न अपराधीलाई प्रहरीले अझै कारवाही गर्न नसकेको भन्दै धनगढीका महिलाहरू आन्दोलित भएका छन् । गत आइतबार धनगढी उपमहानगरपालिका ७ मा ७२ वर्षीय बद्रीप्रसाद जोशी र उनकी ६५ वर्षीया श्रीमती कुन्तादेवी जोशीको विभत्स हत्या गरी कोठामा थुनेर रातभर खसी काटेर भतेर गर्ने अपराधीलाई प्रहरीले नसमातेको भन्दै स्थानीय महिलाहरू आन्दोलित भएका हुन् । हत्यारालाई कारबाही गर, सत्य तत्थ्य बाहिर निकाल, नागरिकको बाँच्ने अधिकार सुनिश्चित गर भन्ने जस्ता नारा लगाई सयौँ महिलाहरू विरोध र्यालीमा उत्रिएका छन् । धनगढी क्याम्पस रोडबाट सुरु भएको विरोध र्याली जिल्ला प्रहरी कार्यालयमा पुगेको छ । प्रहरीले हत्यारालाई नसमातेसम्म शव नबुझ्ने भन्दै आफन्त पनि आन्दोलमा उत्रिएका छन् । प्रहरीले हत्यामा संलग्न भएको आशंकामा पुजा बटाला, समीक्षा साउद, जमुना साउद, रन्तलादेवी साउद र सिमरन धामीलाई सोमबार नै पक्राउ गरेको छ । जिल्ला प्रहरी कार्यालय कैलालीका उपरीक्षक अर्जुन चन्दका अनुसार हत्याको मुख्य अभियुक्त भने फरार छन् र उनीहरूलाई पनि प्रहरीले चाँडै नै कानूनको कठघरामा उभ्याउने छ । उनका अनुसार अनुसन्धान सफलोन्मुख भएको र अपराधीलाई सकभर चाँडै नै सार्वजनिक गरिनेछ ।