जनकपुर अञ्चल बस व्यवसायी संघको आह्वानमा बिहीबारदेखि अनिश्चितकालका लागि सार्वजनिक बस सेवा बन्द भएपछि यात्रुहरु मारमा परेका छन् । बन्दका कारण जनकपुरबाट सञ्चालन हुने छोटो तथा लामो दूरीका सबै सार्वजानिक बस सेवा ठप्प भएको छ । दुर्घटनामा घाइते भएकालाई क्षतिपूर्ति दिने विषयमा विवाद हुँदा प्रहरीले एक बस व्यवसायीलाई पक्राउ गर्न खोजेको विरोधमा जनकपुर अञ्चल बस व्यवसायी संघले बिहिबार बस नचलाउने निर्णय गरेको हो । बुधबार राति १० बजेतिर प्रहरी उपरीक्षकको आदेश छ भन्दै दुईवटा भ्यानसहित पुगेको प्रहरी टोलीले जनकपुर अञ्चल बस व्यवसायी संघका पूर्व अध्यक्ष श्याम सुन्दर चौधरीलाई पक्राउ गर्ने प्रयास गरेको विरोधमा बिहीबारदेखि जनकपुरबाट चल्ने लामो तथा छोटो दूरीका बस बन्द गर्ने निर्णय गरेको संघका कोषध्यक्ष रुपेश चौधरीले बताउनुभयो ।