डुंगेश्वर गाउँपालिका-२ लाँकुरी तुलसेनीकी १४ वर्षकी बालिका मनसरा खड्का हराएको ८ दिनपछि मृत अवस्थामा फेला परेकी छिन् । डुंगेश्वर गाउँपालिका–१ को खाडाखोला दमाखेत भन्ने जंगलमा बिहीबार मृत फेला परेको प्रहरीले जनाएको छ । साउन १९ गते दिउँसो चुप्राबजारको मीलबाट धान कुटेर फर्किंदा मनसरा हराएकी थिइन् । गाईबस्तुलाई छाप काट्न गएका व्यक्तिले चप्पल भेटिएको खवर गरेपछि बाटोदेखि अलि टाढा घाँटीमा सल कसेको, सुरुवाल च्यातिएको र ढुंगाको चरेटामा लडाएको अवस्थामा शव फेला परेको प्रत्यक्षदर्शीहरुले जनाएका छन् । शव नजिकै छाता राखिएको तर उनले मिलबाट बोकेर ल्याएको ७ पाथी चामल फेला नपरेको बताइएको छ । घटना प्रकृतिका आधारमा कुनै व्यक्तिले बलात्कारपछि हत्या गरेको हुन सक्ने भन्दै अनुसन्धान सुरु गरिएको प्रहरी निरीक्षक कृष्ण डाँगीले बताउनुभयो । अत्यन्तै गरिब परिवारकी मनसरा घरकी कान्छी छोरी हुन्, उनका दुई दिदीहरुको विवाह भइसकेको छ । एक जना दाजु शारीरिक रुपमा अशक्त छन् । उनी भैरव आधारभूत विद्यालयमा कक्षा ६ मा पढ्थिन् ।