RSS जनकपुर उपमहानगरपालिका १ मुसहरटोलकी एक बालिकालाई बलात्कारपछि हत्या गरेको आरोपमा स्थानीयवासीले ३५ वर्षीय रामचन्द्र महतोलाई नियन्त्रणमा लिई प्रहरीको जिम्मा लगाएका छन् । महतोले १२ वर्षीया बालिकालाई मंगलबार साँझ पौने ६ बजे घरमै बलात्कार गरी हत्या गरेको स्थानीयवासीको कथन छ । धनुषा बहेराबेला बस्ने महतो बालिकाकै घरमा भाडामा बस्दै आएका थिए । उनीहरूका अनुसार बालिकाका आमा–बुवा र महतोकी श्रीमती कृष्णाष्टमी मेला हेर्न गएका थिए । घरमा दिदी–बहिनीमात्रै भएका बेला महतोले बहिनीलाई पान पराग लिन पठाई उक्त हर्कत गरेको स्थानीयको आरोप छ । बालिकाको क्रन्दन सुनेर भेला भएका टोलबासीले महतोलाई मरनासन्न हुनेगरी कुटपिट गरेका थिए । महतोको जनकपुर अञ्चल अस्पतालमा उपचार हुँदै छ । प्रहरी उपरीक्षक लालमणि आचार्यले प्रारम्भिक अनुसन्धानका क्रममा बालिकालाई बलात्कार गरी हत्या गरेको देखिए पनि शवको पोस्टमार्टमपश्चात् मात्र वास्तविक कुरा सार्वजनिक हुने बताए ।