आन्दोलनरत आंशिक प्राध्यापक सङ्घले त्रिभुवन विश्वविद्यालयका भीसी, रेक्टर, र रजिष्ट्रारलाई भदौ ६ गते साढे ४ बजेदेखि राति ९ बजेसम्म थुनेका छन् । आन्दोलनरत आंशिक प्राध्यापकहरूले त्रिभुवन विश्वविद्यालयको जनप्रशासन क्याम्पस बल्खुभित्रै थुनेका हुन् ।
आंशिक प्राध्यापक सङ्घको नेतृत्वमा गत वैशाख १ गतेदेखि आन्दोलनरत आंशिक प्राध्यापकहरूले आंशिक सेवालाई खारेज गर्न र करार सेवामा नियुक्त गर्न भन्दैराखिएका माग पुरा गर्नमा ढिलाई गरेको आरोप लगाउँदै उनीहरूलाई थुनेका हुन् ।
सङ्घका अध्यक्ष शशिकुमार शर्माले आफूहरूको माग सम्बोधन गर्नमा ढिलाई गरेको आरोप लगाएका छन् । माग पुरा गराउन आन्दोलन गरिएपनि सुनुवाइ नगरेपछि ‘थुन्नु’ परेको उनको भनाई छ ।
साउन १० गतेदेखि त्रिविको मुख्य गेटमा अनसन बसेका प्राध्यापकहरूले केही दिनयता प्रधानमन्त्री निवास बालुवटारमा धर्ना दिँदै माग पुरा गराउन दबाव दिँदै आएका छन् ।
भदौ ६ गते पनि धर्नाको कार्यक्रम सकेर बल्खु पुगेका उनीहरूले भीसी, रेक्टर, र रजिष्ट्रारलाई थुनेका हुन् ।
सङ्घका सदस्य घमराज लुईँटेलले लुकीलुकी काम गर्ने तर आफूहरूको मागको सुनुवाइ नगरेपछि आन्दोलन शसक्त बनाउनुपर्ने अवस्था आएको जानकारी दिए ।
कुलपति एवम् प्रधानमन्त्री शेरबहादुर देउवा आंशिक प्राध्यापकहरूको माग सम्बोधनका लागि सकारात्मक भए पनि त्रिवि पदाधिकारीले चासो नदिएको लुर्इँटेलको आरोप छ ।
कुलपति एवम् प्रधानमन्त्री दउवाले माग सम्बोधन गर्न भनेर यसअघि नै निर्देशन दिए पनि त्रिभुवन विश्वविद्यालयका पदाधिकारीले वास्ता नगरेको सङ्घको आरोप छ ।
माग सम्बोधनका लागि सरकारलाई दबाव दिने उद्धेश्यले गत साउन २६ गतेदेखि त्रिभुवन विश्वविद्यालयका आङ्गिक क्याम्पसहरूमा तालाबन्दी गरेर पठनपाठन ठप्प पारेका छन् ।
आन्दोलनरत आंशिक प्राध्यापक सङ्घ र त्रिभुवन विश्वविद्यालयका पदाधिकारीबिच भदौ ६ गते राति ९ बजेसम्म वार्ता गरेको भएपनि वार्ता असफल भएको भन्दै आंशिक प्राध्यापक सङ्घले थुनिएका कर्मचारीलाई त्यत्तिकै ‘मुक्त’ नगर्ने जनाएको छ ।