काठमाडौंको माइतीघरमा धर्नामा बसेका सडक विस्तार पीडितमाथि प्रहरीले बल प्रयोग गरेको छ । उपत्यकाव्यापी सडक विस्तार पीडित संघर्ष समितिले बुधबार बिहानै माइतीघर मण्डलामा धर्ना दिएका थिए । त्रिपुरेश्वर–नागढुंगा सडक विस्तारका क्रममा आफ्नो जग्गा मिचिएको भन्दै उनीहरुले सर्वोच्च अदालतमा मुद्दा दर्ता गरेका छन् । बुधबार सर्वोच्चमा मुद्दाको फैसला हुने भन्दै दबाब स्वरुप बिहानै ९ बजेदेखि माइतीघरमा धर्नामा बसेका उनीहरुमाथि प्रहरीले लाठी जार्च गरेको हो । प्रहरीको लाठी चार्जबाट पाँच जना घाइते भएका छन् । घाइतेमध्ये विद्या श्रेष्ठको हात भाँचिएको छ । उनलाई बानेश्वरको एभरेष्ट हस्पिटलमा भर्ना गरिएको छ । धर्नामा बसेकाहरुको कारण जाम भएको भन्दै प्रहरीले बल प्रयोग गरेको हो । प्रहरीले बल प्रयोग गरी धर्नामा बसेकालाई हटाउन खोज्दा झडप हुँदा सवारी आवागमन रोकिएको थियो ।