नेपाल कम्युनिष्ट पार्टी नवलपरासीका जिल्ला सेक्रेटरी चित्तलसिंह रानामगर (मंगलसेन)लाई प्रहरीले उनकै निवासबाट शुक्रबार मध्यरातमा पक्राउ गरेको छ । देवचुली नगरपालिकास्थित सुतिरहेको अवस्थामा मगरलाई आफ्नै घरबाट पक्राउ गरिएको हो । दुई दिनअघि नेकपा माओवादीका कार्यकर्ताले मालपोत कार्यालय कावासोतीका प्रमुखलाई कार्यालय समयमै अभद्र व्यवहार गरेको हुँदा त्यसको नेतृत्वलाई अनुसन्धानकालागि नियन्त्रणमा लिइएको इलाका प्रहरी कार्यालय कावासोतीका डिएसपी नवीनराज राज राईले बताए । भूमिसुधार तथा व्यवस्था मन्त्रालयका स्वच्छछवी र कार्य सम्पादनका हिसावले उत्कृष्टको मूल्यांकनमा परेका मालपोत कावासोतीका प्रमुख खगेन्द्र घिमिरेलाई गत बिहीबार माओवादी कार्याकर्ताले अनेक आरोप लगाएर कार्यालयमा अभद्र व्यवहार गरेका थिए । उनलाई अभद्र व्यवहार गरेको आरोपमा नेपाल कम्युनिष्ट पार्टीका अन्य ४ जना जिल्ला नेताहरुलाई प्रहरीले खोजी गरिरहेको जानकारी दिएको छ ।