सामूहिक बलात्कार आरोपमा जनकपुरमा ४ जनालाई प्रहरीले पक्राउ गरेको छ । किशोरीको मुख बाँधेर नहरमा लगी बलात्कार गरेका आरोपितलाई धनुषा प्रहरीले नियन्त्रणमा लिएको हो । घटनाको लामो समयपछि प्रहरीमा पीडितले उजुरी गरेपछि जनकपुर उपमहानगरपालिका १८ स्थित छठघाटमा बसिरहेकी १६ वर्षीया किशोरीलाई सामूहिक बलात्कार गरेको सार्वजनिक भएको हो । पीडितको उजुरीका अधारमा आरोपीलाई पक्राउ गरी अनुसन्धान भइरहेको जिल्ला प्रहरीका उपरीक्षक चक्रबहादुर सिंहले बताए । कात्तिक ९ गते राति ११ बजे छठघाटमा बसेकी किशोरीलाई मदिरा सेवना गरेका ४ युवाले मुख थुनेर जलाशयबाट एकान्तमा लगी बलात्कार गरेका थिए । सामूहिक बलात्कार आरोपमा जनकपुर उपमहानगर १८ का मनीषकुमार मण्डल, राजु मण्डल, गुडु मण्डल र सुनिल मण्डललाई प्रहरीले नियन्त्रणमा लिएको हो ।