सरकारले पेट्रोलियम पदार्थमा गरेको मुल्य बृद्धि र इन्टरनेटको मुल्य बृद्धिको विरोधमा नेपाली कङ्ग्रेसनिकट विद्यार्थी सङ्गठन नेपाल विद्यार्थी सङ्घ (नेविसङ्घ) ले निकालेको मसाल जुलुसमा प्रहरी र विद्यार्थीबिच झडप भएको छ । बिद्यार्थीले ०७५ जेठ २९ गते साँझ पोखरा-लेखनाथ मनपा-१ पृथ्वीनारायण क्याम्पस चोकबाट निकालेको मसाल प्रहरीले नियन्त्रणमा लिन खोज्दा दुवै पक्षबिच झडप भएको हो । झडपमा परी प्रहरी जवान अजय नेपाली र रविशरण बस्नेत घाइते भएका छन् । त्यस्तै नेविसङ्घका जमुना नेपाली, मिनराज शाही, सागर रानाभाट, फिरोज सुवेदी, कमल पौडेल, दिपेन्द्र गौतम, निरज राना, अञ्जित पौडेल र गोविन्द शाही घाइते भएको नेविसङ्घ कास्की जिल्ला अध्यक्ष विकास थापाले बताए । घाइते सबैको उपचार पोखराका विभिन्न अस्पतालमा भएको छ । प्रहरीले भिड नियन्त्रणको लागी भन्दै एक राउण्ड हवाइ फायर र १६ सेल अश्रुग्यास समेत प्रहार गरेको जिल्ला प्रहरी कार्यालयका इन्स्पेक्टर जगदिश घिमिरेले बताए ।