कञ्चनरूप नपा–९ धरमपुरकी ६३ वर्षीया पारोदेवी यादवले उनका पति ६५ वर्षीय हरीलाल यादव, छोरा ३० वर्षीय सुबन यादव र निजकी पत्नी २५ वर्षीया विनीतादेवी यादवविरूद्ध जिल्ला अदालतमा साउन २२ गते घरेलु हिंसाको उजुरी दर्ता गराएकी छिन् । आरोपितहरूले मिलोमतो गरी अंश खोजे कुटेर ठिक पार्छौँ भनी ०७५ जेठ २२ गते निर्घात कुटपिट गरेको पीडितले आरोप लगाएकी छन् । आरोपितहरूले ०७४ कात्तिक ९ गते समेत कुटपिट गरेपछि पीडितले इलाका प्रहरी कार्यालयमा ज्यान मार्ने उद्योगको उजुरी दिएकी थिइन् । सो घटनामा आरोपितहरूले कुटपिट नगर्ने भनी लिखित सहमति गरेपनि पुनः कुटपिट गरेको पीडितले जानकारी दिइन् । जिल्ला अदालतले तीनै जना पीडितलाई कुटपिट, गालीगलौज र यातना नदिई बस्न, खान, लाउन दिनु भनी साउन २४ गते आरोपितहरूका नाममा अन्तरिम संरक्षणात्मक आदेश जारी गरेको छ ।