दुहवी नगरपालिका–२ की २२ वर्षीया रोशन खातुन छोरी जन्माएको कारणले घरबाट निकालिएकी छन् ।

इटहरी उपमहानगरपालिका–१४ की खातुनको विवाह तीन वर्ष अगाडि दुहवी नपा–२ का कुरमान मियाँसंग भएको थियो ।

पीडितले लगातार रूपमा दुई छोरी जन्माएको भन्दै कुटपिटसहित शारीरिक र मानसिक यातना दिँदै घरबाट निकाला गरीदिएको पीडित महिलाका बुवा सलिम मियाँले आरोप लगाए ।

छोरीको विवाहमा सम्धिले मागेको र ज्वाँइले भनेको सबै कुरा नगद सहित दाइजो दिएको पीडितका बावु मियाँले बताए ।

विवाहपछि दाइजो कम भएको धम्की दिँदै कुटपिट गरेकोमा अहिले आएर छोरीछोरी मात्रै जन्माएको भनी रातभर लाठीले कुटेर माघ १२ गते राति घर निकाला गरिदिएको पीडितले इन्सेक प्रतिनिधि समक्ष गुनासो गरिन् ।

पीडित खातुनले न्यायका लागि बावुसहित इलाका प्रहरी कार्यालय दुहवी पुगेकी छन् । प्रहरीले भने गुनासो सुनेर आरोपितलाई बोलाउने र छलफल गराउने प्रतिक्रिया दिएको छ । पीडित खातुनका १४ महिनाकी जेठी र दुई महिनाकी कान्छी छोरी काखमा छन् ।

जयकृष्ण यादव