नौकुण्ड गाउँपालिकामा कार्यरत वडा सचिव ४३ वर्षीय राजु श्रेष्ठलाई नौकुण्ड गाउँपालिका-३ का २६ वर्षीय गणेशमान घले र सोही ठाउँका २९ वर्षीय सूर्यराना तामाङले असार २३ गते कुटपिट गरेको पीडित पक्षको आरोप छ ।

असार २३ गते साँझ मदिरा सेवन गरी कार्यालय परिसरमै आएर श्रेष्ठमाथि कुटपिट गरेको भन्दै घटनाको विरोधमा असार २४ गतेदेखि कर्मचारीले गाउँपालिका कार्यालय बन्द गरेका छन् ।

यसरी कार्यालयमा कार्यरत कर्मचारीहरूलाई धम्की दिँदै कुटपिट गर्ने अपशब्द प्रयोग गर्ने दोषीहरूलाई कानुनी दायरामा ल्याएर कारवाही नगरेसम्म र कर्मचारीलाई सुरक्षाको प्रत्याभूति नभएसम्म कार्यालयको कामकाज ठप्प हुने नौकुण्ड गाउँपालिका प्रमुख प्रशासकीय अधिकृत लोकहरि थापाले असार २४ गते एक विज्ञप्तिमार्फत जानकारी दिए ।

असार अन्तको समयमा आएर कार्यालयको कामकाज यसरी ठप्प हुँदा धेरै काम प्रभावित भएको उनको भनाई छ ।

कुटपिटबाट घाइते भएका श्रेष्ठको असार २३ गते स्थानीय पार्‍च्याङ स्वास्थ्य संस्थामा उपचार गरिएको प्रमुख प्रशासकीय अधिकृत थापाले जानकारी गराए ।