राहतको विषयलाई लिएर कैलालीको टीकापुर नगरपालिकाका दुई वटा वडामा स्थानीयले धर्ना दिएका छन्।

सरकारले कोरोनाबाट बच्न लकडाउनसँगै समाजिक दूरी अनिवार्य गरेका बेला टिकापुर नगरपालिकाकाे वडा नम्बर १ र २ मा त्यसकाे वेवास्ता गर्दै स्थानीयले भीडसहित वडा कार्यालय अगाडी गएर धर्ना दिएका हुन्।

नेपाल सरकारले राहत वितरणको मापदण्ड बनाई वडास्तरबाट दैनिक ज्याला मजदूरी गरी गुजारा गर्दै आएका विपन्न परिवारलाई राहत वितरणका लागि आह्वान गरेसँगै वडाले राहत वितरणमा वास्तविक पीडितभन्दा राजनीतिक पूर्वाग्रहले राहत वितरण गरेको र वास्तविक पीडितले राहत नपाएको आरोप लगाउँदै स्थानीयवासीले वडा कार्यालयमा धर्ना दिन शुरु गरेका हुन्।