चितवन — बाटो बनाउँदा डोजर लगाउनु र ट्याक्टरले खेत जोत्‍नु कुनै नौलो विषय हैन । माडी नगरपालिकाको एउटा वस्ती बाँदरझुलामा भने यी दुवै कार्य गर्न बन्देज छ । बाँदरझुलालाई चितवन निकुञ्जले अतिक्रमित बस्ती मान्दै आएको छ ।

माडी नगरपालिकाले स्वीकृति दिए पनि निकुञ्जले रोकेपछि बाँदरझुलावासीहरु डोजर लगाएर बाटो बनाउन र खेतमा ट्याक्टरले जोत्न पाउनु पर्ने माग राखेर आन्दोलित भएका छन् ।

बाँदरझुलावासीले शुक्रबार चितवन राष्ट्रिय निकुञ्जको अयोध्यापुरी मध्यवर्ती उपभोक्ता समितिको कार्यालयमा विभिन्‍न सात बुँदे माग राख्दै ताला लगाएका छन् । तर प्रमुख दुई माग डोजर र ट्याक्टरकै छ । ‘बाँदरझुलाको बाटो डोजर लगाएर मर्मत गर्दा चितवन राष्ट्रिय निकुञ्जले रोकेको छ । उक्त बाटोको मर्मत कार्य तत्काल सञ्चालन गर्न पाइयोस’ उनीहरुको पहिलो माग यस्तो छ ।