वीरगञ्ज– एकल महिलाको कपाल मुण्डन गरी दुर्व्यवहार गर्ने चारजनालाई प्रहरीले पक्राउ गरेको छ।

प्रहरीले एकल महिलाको कपाल मुण्डन गरी दुर्व्यवहार गर्ने पर्साको छिपमहरमाई गाउँपालिका वडा नम्बर ३ जयमंगलापुरका ५५ वर्षिय मुनीलाल साह कानु, ४० वर्षीय राजदेव ठाकुर, ३५ वर्षकी इन्दुदेवी र ३२ वर्षकी सन्ध्यादेवीलाई पक्राउ गरेको पर्साका प्रहरी नायब उपरीक्षक मनोजित कुँवरले जानकारी दिए।

उनीहरु चारैजनाले सोही ठाउँकी एक महिलाको चरित्रमाथि प्रश्न उठाउँदै सार्वजनिक रुपमा कपाल कपाल मुण्डन गरी दुर्व्यवहार गरेको कुँवरले बताए। पक्राउ परेकाहरु उनीहरु पीडित महिलाकै आफन्त तथा छिमेकी भएको कुँवरले जानकारी दिए।

बुधबार बिहान उनीहरुले कपाल मुण्डन गर्दै ती महिलालाई घरबाट निकालेको सूचना पाएपछि ईलाका प्रहरी कार्यालय पोखरियाबाट खटिएको प्रहरी टोलीले उनीहरुलाई पक्राउ गरी आवश्यक कारवाहीको लागि जिल्ला प्रहरी कार्यालयमा बुझाएको छ।

पाँच जना छोरी र एक छोराकी आमा रहेकी महिलाका श्रीमानको दुई वर्ष पहिले नै निधन भएको थियो। आर्थिक अवस्था कमजोर रहेकी उनी अरुको घरमा काम गरेर जिविकोपार्जन गर्दै आएकी थिइन्।

घटनामा संलग्न रहेकाहरु प्रहरी नियन्त्रणमा रहेको तथा घटनाको बारेमा थप अनुसन्धान जारी रहेको प्रहरी नायब उपरीक्षक कुँवरले बताए।