कैलालीको गेटामा निर्माणाधीन गेटा मेडिकल कलेज यथाशीघ्र सञ्चालन गर्नुपर्ने माग गर्दै नेपाल विद्यार्थी संघले प्रदर्शन गरेको छ । संघले बिहीबार धनगढी-अत्तरिया सडक खण्डअन्तर्गत मेडिकल कलेज अगाडि सडकमा प्रदर्शन गर्नुका साथै केहीबेर चक्काजाम गरेको थियो । नारा, जुलुससहित निकालेको विरोध र्‍यालीमा स्थानीयको समेत सहभागिता रहेको थियो । मेडिकल कलेज सञ्चालनमा सरकारले ढिलाइ गरेकोले दवाव दिन प्रदर्शन गरिएको नेविसंघका नेता पदमराज ओझाले बताए । यही वर्षबाट सञ्चालनमा ल्याउने कार्ययोजना भए पनि सरकारको ढिलाइका कारण कलेज सञ्चालन अनिश्चित रहेको उनले बताए ।