चाडवाडका बेला सीमावर्ती भारतीय बजार बैरगनियासँग जाेडिएकाे सीमानाका खोल्नु पर्ने माग गर्दै रौतहट सदरमुकाम गौरमा बिहीबार स्थानीयले प्रदर्शन गरेका छन् । 

करिब एक हजारको संख्यामा रहेका नेपालीहरुले चाडबाडका बेला सीमा नखोलेको भन्दै विरोध गरेका हुन् । भारतले सीमा खोले पनि नेपालले सीमा नखोल्दा किनमलेका लागि चोरबाटो आउजाउ गर्नु परेको उनीहरु गुनासो थियो ।

चोरबाटोबाट आउजाउ गर्दा भारतीय सुरक्षाकर्मीले मुल नाकाबाट आउनु भन्दै रोक्ने गरेकाले बाध्य भएर बिरोधमा उत्रेको स्थानीय मुन्ना तिवारीले बताए ।

आसन्न चाड तिहार र छठ पर्वका लागि किनमेल गर्न नेपालीहरु सीमावर्ती भारतीय बजार जाने गर्छन् । तर, चाडवाडकै बेला नाका बन्द हुँदा आवश्यक सामान नपाउने अवस्था भएकाले प्रशासनको ध्यानाकर्षण गर्न प्रर्दशन गरिएको स्थानीय जगरनाथ साहले बताए ।