१३ माघ, काठमाडौं । नेपाल विद्युत् प्राधिकरण, ठिमी वितरण केन्द्रका तीनजना कर्मचारीमाथि दुर्व्यवहार भएको छ ।

दश महिनाभन्दा बढी विद्युत् उपभोग गरेर महसुल नतिरेको पाइएपछि लाइन काट्न जाँदा सिरुटारमा कर्मचारीमाथि दुर्व्यवहार भएको हो ।

ठिमीका मिटर रिडिङ सुपरभाइजर प्रमोद खड्काले अनलाइनखबरलाई बताएअनुसार रुद्र केसीको घरमा विद्युत् काट्न जाँदा कर्मचारी दावा ढकाल, कृष्णबहादुर सुवाल र गोविन्द श्रेष्ठमाथि दुर्व्यवहार भएको हो ।

‘कृष्णबहादुर सरलाई कठालोमा समातेर दुर्व्यवहार गरेको भिडियो नै छ, नियम बमोजिम लाइन काट्न जाँदा कर्मचारीमाथि हातपात गर्ने काम भयो’, खड्काले भने ।

पीडित कर्मचारीले प्रहरीकहाँ जाहेरी दिने तयारी गरेको समेत उनले बताए । घरमा रहेका व्यक्तिहरुले भने प्राधिकरणले विना जानकारी लाइन काटेको गुनासो गरेका छन् ।