प्रहरीले खुवालुङ संरक्षणमा जुटेका अभियन्ता दिनेश काम्दुङ खुम्बु र साजन राईलाई पक्राउ गरेको छ ।

प्रधानमन्त्री केपी शर्मा ओलीले ८ फागुनमा विराटनगर पुगेर किराँतहरूको सांस्कृतिक र मिथ जोडिएको खुवालुङ ढुंगा फुटाउने घोषणा गरेपछि किराँतहरू आन्दोलित भएका थिए ।

सप्तकोसीमा जहाज चलाउने भन्दै किराँतहरूको सांस्कृतिक बिम्ब खवालुङ ढुंगा फुटाउने सरकारी योजनाको विरोध गरिरहेका अभियन्तालाई अहिले सप्तकोसीका डुंगा चलाइरहेकाहरूको उजुरीमा पक्राउ गरिएको किराँत राई विद्यार्थी संघका अध्ययक्ष रामचन्द्र राईले जानकारी दिए ।

किराँत सभ्यता र मुन्दुमका मिथ जोडिएको उक्त ढुंगा उदयपुर, धनकुटा र भोजपुरको सीमानामा पर्छ । वराह क्षेत्रनजिकै रहेको खुवालुङ क्षेत्रमा किराँतहरूले पूजा तथा अनुष्ठान गर्दै आएका छन् ।