सीताराम विवाह पञ्चमी महोत्सव भित्रिसक्दा समेत जनकपुरधाम उपमहानगर क्षेत्रमा सरसफाई नभएको भन्दै जनप्रतिनिधिहरुले नगर प्रमुख लालकिशोर साहको पुत्ला दहन गरेका छन् । सीताराम विवाहपञ्चमी महोत्सवको पूर्वसन्ध्यामा भगवानको डोला लिएर परिक्रमा गर्ने मार्ग नै सरसफाई नभएको र श्रद्धालु भक्तजनलाई कठिनाई भए पनि महानगरले सरसफाईमा ध्यान नदिएपछि विरोधस्वरुप नगर प्रमुखको पुत्ला दहन गरिएको हो । जनकपुरधाम उपमहानगरपालिका वडा नम्बर ७ का वडा अध्यक्ष जानकीराम साहले एक महिनापूर्व नै नगर प्रमुख साहलाई सरसफाईका लागि जानकारी गराउँदा समेत फोहोर नहटाएकाले बाध्य भएर पुत्ला दहन गरेको बताए । उनले जनकपुरधाम वडा नम्बर ७ र ४ मा एक महिनादेखि फोहोर उठाउनका लागि उपमहानगरले गाडी नपठाएको बताए । जानकी मन्दिरको पहलमा जनकपुरधाम उपमहानगरका प्रमुख लालकिशोर साहले विवाह पञ्चमीको अवसरमा सरसफाई अभियान चलाए पनि विभिन्न सडकमा फोहोरको डंगुर थुपारिएकै छ ।