कौडेना गाउँपालिका–५ मोतिपुरकी २४ वर्षीया लिलम देवी महतोलाई जेठ १० गते पति २६ वर्षीय विनोद महतो र ससुरा ५२ वर्षीय जोगिन्द्र महतोले कुटपिट तथा घरेलु हिंसा गरेको आरोपमा पीडितले जिल्ला प्रहरी कार्यालय मलङ्गवामा जेठ १७ गते उजुरी दिएकी छिन् ।

पीडित महिलालाई दाइजो बापत नगद एक लाख रुपियाँ र एउटा ईन्डियन मोटरसाईकल नल्याएको भन्दै आरोपितहरूले कुटपिट तथा घरेलु हिंसा गरेको पीडित महिलाका बुबा ४७ वर्षीय रामकिशोर महतोले बताउनु भयो । कुटपिटका कारण पीडितको बायाँ खुट्टा र हातमा चोट लागेको उहाँले बताउनु भयो ।

पीडित महिलाको सामान्य उपचार जेठ ११ गते देखी १३ गते सम्म सर्लाही जिल्ला अस्पताल मलङ्गवामा भएको थियो र थप उपचारका लागि जनकपुर लगिएको बुबा महतोले बताउनु भयो ।

पीडित महिला र आरोपित पति विनोद महतोबिच ०७५ वैशाख १८ गते हिन्दु परम्परा अनुसार विवाह भएको थियो ।

विवाहमा दुई लाख रुपियाँ, एक तोला सुन, फर्निचर तथा अन्य समान दिए तापनि थप दाइजो नल्याएको भन्दै आरोपितले कुटपिट गर्ने गरेको पीडित महिलाका बुबाको आरोप रहेको छ ।

घटना बारे अनुसन्धान भइरहेको जिल्ला प्रहरी कार्यालय मलङ्गवाका डिएसपी दिपेन्द्र पंजियार थारुले जानकारी दिनु भयो ।