मलेकपुर गाविस-५ खुरहुरियाकी ३० वर्षीया मायावतीदेवी मण्डलले दिएको उजुरी दर्ता गरी अनुसन्धान कार्य अगाडि बढाउन अदालतले जिल्ला प्रहरी कार्यालयलाई ०७१ फागुन १० गते परमादेश जारी गरेको छ । पुनरावेदन अदालतका न्यायाधीशद्वय बालकृष्ण उप्रेती र तेजबहादुर र्राईको संयुक्त इजलाशले प्रहरीलाई सो आदेश गरेको अधिवक्ता समिम अख्तरले जानकारी दिए । पीडितलाई जेठाजु ५५ वर्षीय भुनिलाल मण्डल, निजका छोराहरु ३० वर्षीय जीवछ मण्डल र २८ वर्षीय अरबिन्द मण्डलले ०७१ कात्तिक ६ गते कोदालोको बिँडले पेटमा प्रहार गर्दा तीन महिनाको गर्भ तुहिएको थियो । घाइते पीडितको राजविराज नपा-३ स्थित गजेन्द्रनारायण सिंह सगरमाथा अञ्चल अस्पतालमा उपचार भएको र अस्पतालका चिकित्सकले कुटपिटबाट गर्भपतन भएको बताएको पीडितका पति शंकर भनिने परमेश्वर मण्डलले जानकारी दिए । पीडितका पतिले कात्तिक ११ गते जिल्ला प्रहरी कार्यालयमा उजुरी दिएका थिए । अञ्चल अस्पतालमा कात्तिक १३ गते पीडितको घाउ जाँच गरिएको थियो । प्रहरी र प्रशासनले उजुरी दर्ता नगरेपछि उनले जिल्ला प्रहरी कार्यालय र जिल्ला प्रशासन कार्यालयविरुद्ध मङ्सिर १४ गते निषेधाज्ञामिश्रति परमादेशको रिट दायर गरेका थिए । मनोहरकुमार पोखरेल