रामेछाप मन्थली नगरपालिका-१४ भटौलीकी ३५ वर्षीया पदमकुमारी मगरलाई हत्या गरेको आरोपमा पति ४२ वर्षीय नेत्रबहादुर मगरलाई रामेछाप जिल्ला अदालतले सर्वस्वसहित जन्मकैदको फैसला गरेको छ । जिल्ला अदालत रामेछापका न्यायाधीश किरणप्रसाद शिवाकोटीको इजलासले पत्नी हत्याका आरोपित नेत्रबहादुरलाई फागुन १८ गते सर्वस्वसहित जन्मकैदको फैसला गरेको हो । आरोपित नेत्रबहादुरले पत्नी पदमकुमारीलाई पुस १० गते छोराछोरीलाई घर बाहिर निकाली कोठा थुनेर हत्या गरेको जाहेरी मृतकका दाजुले पुस ११ गते जिल्ला प्रहरी कार्यालय रामेछापमा दिएका थिए । हत्याको आरोपमा पुस ११ गते गिरफ्तार परेको नेत्रबहादुर जिल्ला अदालतको २०७२ पुस २८ गतेको आदेशले पुर्पक्षका लागि थुनामा थिए । पुर्पक्षका लागि थुनामा रहेका नेत्रबहादुरलाई फागुन १८ गते रामेछाप कारागार चलान गरिएको जिल्ला अदालतका श्रेष्तेदार मनोजकुमार श्रीवास्तवले बताए ।