मदिराले लठ्ठ भएर आफ्नी वृद्ध आमालाई कुटपिट गरेर हत्या गरेको अभियोगमा यहाँको प्रहरीले एक युवालाई पक्राउ गरेको छ । लमही नगरपालिका–८ अर्नहवा निवासी ७० वर्षीया मंगलादेवी रावतको कुटपिट गरि हत्या गरेको आरोपमा उनका ३१ वर्षीय छोरा विमल रावतलाई प्रहरीले पक्राउ गरेको हो । प्रहरीका अनुसार चैत ७ गते वेलुका घरमा विरामी अवस्थामा रहेकी आमा मंगलादेवी रावतलाई मदिरा सेवन गरेका विमलले लठ्ठी र ईट्टाले हानेर घाईते बनाएका थिए । छोराको कुटाईबाट घाईते आमाको उपचारका क्रममा शुक्रबार राप्ती उपक्षेत्रीय अस्पताल घोराहीमा मृत्यु भएको थियो । अशक्त आमालाई कुटपिट गरि विमल फरार भएका थिए । आमाको मृत्यु भएपछि विमललाई पक्राउ गरिएको वडा प्रहरी कार्यालयका प्रमुख प्रेमबहादुर खड्काले जानकारी दिए । उनकी आमा प्यारालाइसिस भएर थला परेकी थिइन् ।