विराटनगर, ९ भदौ । विराटनगर महानगरपालिकाभित्रका सफाई कर्मचारीहरुले विगत दुई दिनदेखि फोहोर उठाएका छैनन् ।

सफाई कर्मचरीहरुले कोरोना महामारीका समयमा विराटनगर महानगरपालिका र वेस्ट म्यानेजमेन्ट ग्रुप नेपालद्धारा संयुक्त रुपमा सञ्चालित फोहोरमैला व्यवस्थापन परियोजनाले सफाई कर्मचारीलाई कामबाट निकालेको भन्दै विरोध जनाएका छन् ।

उनीहरुले लकडाउनको समयमा अन्य काम नपाउने र वर्षौंदेखि गर्दै आएको सफाई कामबाट निकालेको आरोप लगाएका छन् । महानगरपालिका भित्र १ सय ७० जना सफाईर्मीहरु रहेका छन् ।

उनीहरुले आप्mनो रोजीरोटी खोसिएको भन्दै आन्दोलन गरिरहेका हुन् । उनीहरुले आधा कर्मचारीलाई काममा बोलाउने र आधा कर्मचारीलाई विदा दिने परियोजनाको निर्णयप्रति विरोध गरेका हुन् ।

मरिक टोल संगठनका अध्यक्ष सिकन्दर मरिकले फोहोर व्यवस्थापन परियोजनाले सफाई कर्मचरीको स्वास्थ्य बीमासमेत नगरेको र यस्तो कोरोना महामारीको समयमा सफाई कर्मचारीहरुलाई कामबाट विदा दिएको आरोप लगाएका छन् ।

तर, यता साझोदार संस्था फोहोमैला वयवस्थापन परियोजना विराटनगरका प्रमुख देवी आचार्यले भने लकडाउनका कारण होटल, बजार स्कुल सवै व्यवसाय बन्द भएका कारण कर्मचारीलाई तलव खुवाउन नसक्ने बताएको छ ।

साथै, कर्मचारीलाई एक दिन विराएर काममा आउन भनेको जानकारी दिएकी छन् । उनले लकडाउनका कारण सेवाग्राहीबाट सेवा शूल्क बापत विगत ५ महिनादेखि मासिक १० लाख घाटा व्यहोर्दै आएको हुनाले कर्मचारीहरुलाई सेवासुविधा दिन समस्या भएको बताइन् ।

महानगरपालिकासँग २०७३ वैशाखदेखि सम्झौता बमोजिम उक्त ग्रुपले विराटनगरको फोहोर व्यवस्थापन गर्दै आएको छ । सबै कर्मचरीलाई दैनिक काम दिनुपर्ने माग पूरा नभएसम्म फोहोर नउठाउने उनीहरुले बताएका छन् ।