सर्लाही — सागरनाथ वन विकास परियोजनामा दैनिक ज्यालादारीमा कार्यरत मजदुर आन्दोलित भएका छन् । श्रम ऐन कार्यान्वयनको माग गर्दै उनीहरू बिहीबार कार्यालयको मुख्य गेटमा धर्नामा बसेका हुन् ।

मुख्य गेटमै मजदुरहरू धर्नामा बसेपछि कार्यालयको काम प्रभावित बनेको छ । श्रम ऐन लागू गर्न पटकपटक लिखित जानकारी गराउँदा पनि माग सम्बोधन नभएकाले आन्दोलनमा उत्रिनुपरेको परियोजनाका मजदुर युनियन अध्यक्ष सन्तोष साहले जानकारी दिए । 

परियोजनामा १ सय ३६ जनाले ज्यालादारीमा काम गरिरहेका छन् । ‘लामो समयदेखि काम गर्दा पनि न नियुक्ति पत्र छ, न त श्रम ऐनअनुसार सेवा सुविधा नै पाइएको छ,’ साहले भने, ‘आठ घण्टा काम गर्नुपर्नेमा बढी लगाइए पनि त्यसअनुसारको सुविधा पनि पाइएको छैन, पटकपटक मागबारेमा ध्यानाकर्षण गराइए पनि सम्बोधन नभएकाले बाध्य भएर आन्दोलनमा उत्रिनुपरेको छ ।’