गोरखा : फिल्डमा खटिएका बेला आफूमाथि जातीय विभेद भएको भन्दै गोरखा भेटेरेनरी अस्पतालका पशु स्वास्थ्यकर्मीले प्रहरीमा उजुरी गरेका छन्।

गत आइतबार भीमसेन थापा गाउँपालिका वडा नम्बर-७ झप्रीमा खोप लगाउन जाँदा स्थानीय मीरा पौडेलले आफूमाथि जातीय विभेद गरेको भन्दै मंगलबार पशुस्वास्थ्यकर्मी  प्रीति गैरे र विशाल सिर्मलले प्रहरीमा उजुरी गरेका हुन्। उनीहरुले आज अस्थायी प्रहरी चौकी बोर्लाङमा उजुरी दिएका हुन्।

‘हामी गोरखा भेटेरेनरी अस्पतालद्वारा यही असार ५ गतेबाट सन्चालन भएको पशु पूर्ण खोप अभियान अन्तर्गत त्यहाँ पशुलाई खोप लगाउन गएका थियौँ। खोप लगाउन गोठमा जान खोज्दा तिमी त तल्लो जातको, हाम्रो गाई छ तिम्ले छुुनु हुन्न भनेर विभेद गर्नुभयो। अनि मसँगै गएको विशाल भाइ र म त्यहाँबाट बाहिर निस्कियौँ, हामीसँगै गएका लक्ष्मण श्रेष्ठ हुनुहुन्थ्यो, उहाँले खोप लगाइदिनुभयो’, गैरेले थाहाखबरसँग भनिन्। गैरे र श्रेष्ठ गोरखा भेटेरेनरी अस्पतालमा करारमा कार्यरत छन् भने सिर्मल ओटेजी गरिरहेका छन्।